සමගි ජන බලවේගය දෙකඩ කිරීමේ හෝ ආණ්ඩුවට එකතුවීමේ කිසිදු සූදානමක් නොමැති බව එම පක්ෂයේ මහ ලේකම්, පාර්ලිමේන්තු මන්ත්‍රී රංජිත් මද්දුම බණ්ඩාර මහතා පවසනවා. විශේෂ මාධ්‍ය හමුවකට එක්වෙමින් ඔහු මේ බව සඳහන් කළේය.
සමගි ජන බලවේගයේ මන්ත්‍රීවරුන් 20 දෙනෙකු සමග රංජිත් මද්දුමබණ්ඩාර මහතා ආණ්ඩුවට එකතුවීමට සූදානමින් සිටින බවට ඇතැම් පුවත්පත් වාර්තා කර තිබූ අතර එවැනි සූදානමක් පිළිබඳව සමාජ මාධ්‍ය හරහාද දැඩිලෙස කතාබහට ලක්ව තිබේ.
පාර්ලිමේන්තු කමිටු ක්‍රමයක් හරහා රටේ අර්බුදවලට විසඳුම් සෙවීමට තම පක්ෂය යෝජනා කර ඇති බවත්, එසේ තිබියදී ඇමතිකම් ලබාගෙන තවත් බරක් ජනතාව පිට පැටවීමට සූදානම් නොමැති බවත් මද්දුමබණ්ඩාර මහතා අවධාරණය කරනවා.
සමගි ජන බලවේගය ශක්තිමත්ව ඉදිරියට යද්දී එය ඉවසා ගත නොහැකි ඇතැම් කණ්ඩායම් මෙවැනි අසත්‍ය පුවත් පළකොට පක්ෂය දෙකඩ කිරීමේ සැළසුමක් දියත් කරමින් සිටින බව පෙන්වා දෙන සජබ ලේකම්වරයා පවසන්නේ එවැනි කඩාකප්පල්කාරීන්ගේ බලාපොරොත්තු කිසිවිටෙකත් ඉටු නොවන බවයි. සජබය යනු එසේ කඩා බිඳ දැමිය හැකි පක්ෂයක් නොවන බව ඔවුන් මතක තබා ගත යුතු බවද රංජිත් මද්දුමබණ්ඩාර මහතා අවධාරණය කරනවා.
